c1.

Quimanextia tentlatzacuilcayotl tlen quipiya nahui icaquiz. 1. /k/ Quemman quitzinpehualtia zo quitzontlamiltia piltlahtoltzin, zo quemman quitzontlamiltia achitencaquiliztli huan axcanah yohui teipan QU, E, Ē, I1 zo Ī1, motzacua tocopac, tonenepiltzintlan quinamiqui huan quitzacua ihyotl; teipan tlamahcauhtehua nochi huan quiztihuetzi ihyotl tlatlahco tocamac; tlapohui totozcaamayo quemman ihyoquiza huan axcanah papatlaca. 2. /h/ Quemman quitzontlamiltia achitencaquiliztli huan teipan yohui QU, motzacua tocopac, tonenepiltzintlan quinechcahuia huan quicopichoa ihyotl tlen zozomoca achi yamanic quemman pano tlatlahco; tlapohui totozcaamayo quemman ihyoquiza huan axcanah papatlaca. 3. /h/ Quemman C2 quitzontlamiltia achitencaquiliztli motzacua tocopac, tonenepiltzintlan quinechcahuia huan quicopichoa ihyotl tlen zozomoca nelyamanic quemman pano tlatlahco; tlapohui totozcaamayo quemman ihyoquiza huan axcanah papatlaca. 4. /s/ Quemman quitzimpehualtia achitencaquiliztli huan teipan yohui E, Ē, I1 zo Ī1, motzacua tocopac, totenxipal quentzin tlapohui, totlancoch tlen echcapan quinechcahuia tlen huahcapan, tonenepilpitzauhca quinechcahuia iican totlanixcuauh huan quicopichoa ihyotl tlen zozomoca quemman pano tlatlahco; tlapohui totozcaamayo quemman ihyoquiza huan axcanah papatlaca.